銅鑼灣掃桿埔（大球場）係電單車考生常見嘅試場，8字相對平坦。近年運輸署已經有優化咗一些系統，所以以2026年7月為例子，港島區路線考期係咁多個考場之中排期最快，大概兩個月就可以攞到考期啦；運輸署現時表明駕駛考試冇固定輪候時間，報考前要再睇最新安排。呢個試場包括兩條路線：東院線、樂活線。今日就首先為大家介紹東院線！ （最新輪候時間：運輸署：駕駛考試輪候時間）

這不只是一篇路線介紹文章

如何善用這篇文章和影片，才能達到最大成效？認得路線點行遠遠未夠，呢次輝Sir希望大家留意細節，例如我選擇嘅線位、觀察嘅方向同原因，呢啲都能幫助你找出並避開潛在的危險，改善你嘅駕駛情況同增加考試合格機會。尤其係Youtube的實拍影片，輝Sir一take過拍攝，即場錄音無後期配音，裡面包含咗我好多心得，大家記得留意我講嘅重點同埋行嘅位置。道路標記、交通安排及考試路線日後有機會改變，實際應考時應以現場道路標誌、交通情況及考牌主任指示為準。

（一）出試場，入東院道

開車之前，記得望鏡、擰頭，睇清楚附近有冇其他考生仲喺度練習，安全先至起步。試場打完八字落斜路，路口查看左右交通情況，安全情況下右轉再右轉，轉入東院道。連續轉兩個右彎，要小心啲轉彎行車路線，避免俾考官捉「轉彎位置不正確」。轉彎之前記得提早留意路口，唔好去到路口先至擰頭，唔然反應同動作都做唔切。如果交通情況順暢就記得選擇適當波段行駛，亦要留意路口有無車。

（二）棉花路讓路口

危險！連續兩個讓路口，地下兩個黃格、安全島，請預留足夠時間同距離俾自己做反應。唔好去到讓路線先至急煞。過咗醫院停車場入口，沿路駛入銅鑼灣道後，會見到呢條街第一支紅綠燈。呢支燈非常過癮，行幾架車就會轉燈，記得俾足耐性。見到轉燈或者前車開始收慢，都要保持耐性，唔好心急追住過。

（三）聖保祿醫院

過完紅綠燈直行，左邊長期泊有人泊車，越過障礙物要有足夠距離、動作要做足；右邊對面線有巴士上落客，特別多人亂過馬路，從對面線車罅間突然出現，打醒十二分精神，不宜開太快。就算見到綠燈都唔代表可以唔理現場情況一直去，安全先係最後決定行唔行嘅條件。

咁就嚟到銅鑼灣道第二支紅綠燈，準備轉左入禮頓道。轉入去之前記得留意右手邊路口有無車先好入去，安全第一！

（四）轉入禮頓道

視乎時間，如果係放學時間會比較多家長、菲傭接放學，視線要一眼關七。選線要靈活，安全而且前面暢通嘅情況下應盡快返回左線，同時要留意右方印尼領事館路口、左方希雲街路口有無車駛出。過埋希雲街你會嚟到丹麥餅店，亦係禮頓道第一支紅綠燈。印尼駐港總領事館現址仍然位於禮頓道127至129號。

（五）禮頓道巴士站

丹麥餅店紅綠燈前面有黃格，切忌跟車太貼，未肯定前面有足夠位置俾你完全駛出黃格之前，唔好盲目跟前車入去，否則交通燈一轉，前車停低，你就可能被困喺黃格入面。之後黃格前行一段就有個巴士站。
突擊測驗：究竟巴士站可唔可以停車？如果你仲未識答，記得睇睇呢度喇。根據現行法例，除專利巴士外，其他車輛一般唔可以喺指定巴士站停車，但如果因為交通情況而無法繼續前進（例如前面紅燈塞車）就屬例外；正常跟車排隊而停喺行車線上，同主動駛入巴士站停車係兩件事，亦唔可以揀巴士站作為等考牌主任嘅位置。過埋巴士站打左燈，迎接禮頓道第二支紅綠燈，準備左轉入連道。

（六）轉入連道

轉入加路連山道後繼續打左燈，準備再左轉入加路連山道，留意連道（對頭車）有無車同你爭住轉彎，一般情況下，你應行使道路嘅優先使用權。有優先使用權唔代表可以夾硬去，都要觀察對頭車嘅車速同意圖，發現對方冇減速或者未有讓路跡象，就要預備收慢甚至停車。

（七）加路連山道（南華會段）

就返試場，唔少考生都掉以輕心！左邊有時會停泊私家車、貨車上落貨、的士上落客。呢個時候應該更加預早留意前面情況，判斷前面係「死車」定係隨時會移動嘅車。除咗睇車身有冇郁，都可以留意煞車燈、車輪方向、車門有冇打開，判斷駕駛者有冇準備開車。由於道路唔闊，應該特別留意左右距離，尤其係越過障礙物嘅時候。眼望遠方，多加留意後鏡，做足動作，及早反應，有咩都難唔到你嘅！

（八）返試場

過埋南華會幾乎都返到試場，打右燈右轉入東院道，再右轉入試場。一般左邊線都會有學車（Van或電單車都計）排隊練車，左邊奧運大樓亦有機會有車出入，記得要做足越過障礙物動作。唔好因為已經見到試場入口，就當自己完成咗考試，仍然要留意前面有冇考生練習8字、行人會唔會橫過。

行到黑線附近停車，師傅指示嘅位置、或考官事前指示嘅位置停低。 停車，落左腳，擰頭望左右、熄匙、落右腳、落側架、從車嘅左邊落車。

（九）落車

嫌我長氣都要講多次，唔好呢步先做錯呀！記得慢慢來，無人會催你嘅！最後教你一個停車小秘訣：「由頭做到腳」。係咩意思呢？下次跟住呢個次序做啦：

頭：左右望查看交通情況

右手：右手熄匙後，繼續緊握頭制動，唔好即刻鬆手

左手：鬆開離合器

右腳：繼續坐車，右腳而家先好落地

左腳：踩低側架，確認側架已經完全打開，最後車身左邊落車

總結

東院試路短，但下晝人車較多，上課時需要重點訓練對交通情況嘅敏銳度同即時反應。只要你學識道路上嘅原則，就算遇到未見過嘅突發情況，你都可以靈活應變，真正咁征服考試。沿途亦有泊車、巴士站、行人、黃格同多個支路，上堂時唔應該只係練熟點樣行，而係要訓練自己提早閱讀交通情況，判斷潛在危險，再選擇合適嘅線位、車速同波段。

如果你準備緊電單車路試，上面講嘅呢啲技巧都已經包括曬喺我呢個電單車路試網上課程：

透過呢個網上課程嘅知識配合實戰訓練，輕鬆駕馭電單車路試！

輝Sir電單車學員而家報讀網上課程，更可享總共高達$1,899回贈，詳情請立即聯絡我：61984059