上次講解過銅鑼灣掃桿埔嘅東院線，今次就沿住另一條掃桿埔考試路線——樂活線（樂活道）逐段睇。樂活線雖然有條大斜路，但一般交通情況比東院線通爽；想準備得穩陣，就要理解加路連山道接駁連道嘅讓路口，同埋樂活道斜坡頂黃格點樣處理。以下會保留原有路線次序，逐段講清楚要觀察嘅位置。

掃桿埔樂活線最需要留意三個位置：加路連山道接駁連道嘅讓路口、樂活道大斜路，同埋斜坡頂交通燈後面嘅黃格。

認得樂活線點行只係第一步

睇文章同實拍影片時，要一齊留意輝Sir選擇嘅線位、望鏡擰頭方向、讓路時機同原因，再對照自己練習時最容易失準嘅位置。路面情況隨時會變，考試都係睇你當刻有冇觀察同安全判斷，唔係背熟路線就夠。

（一）出試場，入加路連山道

喺掃桿埔試場打完8字，落斜路，路口查看四周交通情況，安全情況下左轉入加路連山道。
注:留意上面嗰張圖，駕駛者係將左腳踩住佢蓋呢個位置確保自己同讓線前後有少許距離，起步就更加容易，轉彎亦唔會搞到心急，搞到極短距起步而死火。

由試場左轉入加路連山道後，先因應車速選擇合適波段，同時留意後車、停車場出入口，同對面線停泊或上落客嘅車。去到接駁連道嘅讓路口前要預早收慢，確認視線、停車位置同前面空間，再決定幾時駛出。

（二）加路連山道（接駁 連道）讓路口

去到加路連山道接駁連道嘅讓路口，真正難處唔係記得要讓，而係停喺邊度先睇得清楚，同埋幾時先有足夠空間安全駛出。

輝Sir有幾個貼士俾大家：

（1）不妨停得比較貼近白色虛線，咁先比較容易睇到從上而下嘅交通情況，不過切記唔可以踩界呀！

注:圖下面駕駛者將左腳放喺接近三角形嘅右上角，車頭就會貼近白線又唔會踩界。

（2）避免扭右軚同急速剎車。路面左高右低，停車扭右軚的話，架車向右傾，增加落右腳風險。另外路面不平，急速剎車亦更容易失平衡。

（3）試下判斷夠唔夠位俾你同考官一齊過到個讓路口，唔好見有少少位就出，盡量預返足夠你同考官都出到，咁就穩陣得多。出到路口係一回事，安全出到路口又係另外一回事。

停定後可以因應視線稍微調整身體位置，令自己睇到更多上落斜車流；塞車唔係考生嘅錯，睇唔清楚就繼續等，唔好因為等得耐而夾硬出。讓路路口並非任何情況都一定要完全停車：官方要求係讓路予大路車輛，如有需要先停車等候，重點係睇清楚同確保有足夠安全空間，唔係為停而停。

（三）加路連山道（保良局段）

小心留意路面線路同黃格，黃格所在亦係保良局停車場出入口，宜收慢車速，留意有無車；亦要留意右邊有冇支路車輛駛出，預留反應時間先繼續前進。駛至樂活線嘅第一盞交通燈前就已經要預早留意前方讓路口有冇車，再左轉入禮頓道。

（四）禮頓道

呢段路重點唔係死記第幾盞燈，而係留意每個路口嘅黃格範圍、同前車保持嘅距離，同埋預早喺路口前選定行車線嘅原因——等自己有足夠時間反應同轉線，唔會臨到路口先臨時變線。繼續往前駛，你應該會去到第二盞交通燈。交通燈後禮頓里有路口需要留意，而且地面有黃格，宜與前車保持距離，等自己有足夠時間做反應。過咗禮頓里，去到第三盞交通燈，前面有一個比較長嘅黃格區域，同樣需要留意。

一直駛到皇冠假日酒店門口，記得留意有無車進出，連對面線也有機會有車轉入。在黃格前預先選好將會要行邊一條行車線，再過埋第5盞交通燈左轉入黃泥涌道。

（五）黃泥涌道

黃泥涌道左邊線常有私家車停泊，右邊則有電車行駛。按圖片所示路段選擇較穩定嘅瀝青位置行駛，同時避免突然扭軚、急煞或者大幅改變線位；落雨時電車軌、金屬物件同道路標記會更加濕滑，要特別留意。

一直行在紀利華木球會旁嘅第六盞交通燈，之後將會抵達黃泥涌道巴士站。如果巴士停車嘅時候任何部份佔用你嘅行車線，你都需要做足過障礙物動作。過埋巴士站，你將會左轉上樂活道。

（六）轉入樂活道上斜

從黃泥涌道第7個燈位，左轉入樂活道上斜，樂活道頗為陡斜，建議以低波行車。上斜會經過兩個路口，第一個在左邊聖瑪加利大堂，第二個在右邊雲地利道，宜多加留意。

上斜如果需要停車，宜提早轉回一波，以免手忙腳亂；斜路開車亦要俾多啲油，避免溜後，跟住一直上到頂會見到樂活線嘅第8盞交通燈。

樂活道大斜路應該用幾多波？
唔可以單靠一個固定波段回答，要因應車速、交通情況同車款判斷。按影片示範，路面暢通時可以使用二波上斜；預計需要停車，就應提早準備轉回一波。停定後重新起步，要先穩定摩擦點、油門同腳掣，再安全開車。

（七）樂活道斜坡頂

喺上斜過完交通燈，前面斜坡頂就係黃格，加上斜坡令你視線受阻，究竟應該點樣處理呢？輝Sir教學上會將交通燈後、黃格前呢段可供駕駛者重新觀察前方空間嘅位置，稱為「緩衝區」。如果你睇唔到前面黃格有無足夠空間通過，可以喺呢段位置觀察，同時避免同前車距離太近，盡量令自己視線可以望到前面交通情況。官方道路標記嘅規則好簡單：出口未暢通，就唔應該駛入黃格；官方說法係「出口暢通無阻，才可駛進」，並冇將呢段空隙正式命名為「緩衝區」，「緩衝區」只係輝Sir教學上方便大家理解嘅稱呼。

通過黃格之前，斜坡頂左邊亦有路口需要留意。

（八）連道（落斜）

過埋樂活道嘅斜坡頂，就繼續直行喺連道落斜。落斜時前後掣要互相配合：前掣負責平順減速，後掣幫手穩定車身，兩者力度都唔應該太急，同時同前車保持適當距離，令自己隨時有足夠空間及時停車。沿途會有第九盞交通燈（最後一盞喇），雖然轉紅燈嘅頻率唔高，但絕對唔應該太「老定」，應該留意交通情況（例如前面車輛嘅煞車燈），隨時有停車嘅準備。 去到減速牌附近可以打右燈，查看交通情況然後靠右。

駛到路口，如果交通情況唔明朗，應該喺等候區停車等待，然後右轉入加路連山道。

（九）加路連山道（南華會段）

就返試場，唔少考生都掉以輕心！左邊有時會停泊私家車、貨車上落貨、的士上落客。呢個時候應該更加預早留意前面情況，判斷前面係「死車」定係隨時會移動嘅車。由於道路唔闊，應該特別留意左右距離，尤其係越過障礙物嘅時候。越過障礙物打燈嘅時機可以參考我以下呢組連環圖。

眼望遠方，多加留意後鏡，做足動作，及早反應，有咩都難唔到你嘅！

（十）返試場

過埋南華會幾乎都返到試場，打右燈右轉入東院道，再右轉入試場。

一般左邊線都會有學車（Van或電單車都計）排隊練車，左邊奧運大樓亦有機會有車出入，記得要做足越過障礙物動作。行到黑線附近停車，師傅指示嘅位置、或考官事前指示嘅位置停低。停車，落左腳，擰頭望左右、熄匙、落右腳、落側架、從車嘅左邊落車。

（十一）落車

嫌我長氣都要講多次，唔好呢步先做錯呀！記得慢慢來，無人會催你嘅！最後教你一個停車小秘訣：「由頭做到腳」。係咩意思呢？下次跟住呢個次序做啦：

頭：左右望查看交通情況

右手：右手熄匙後，繼續緊握頭制動

左手：鬆開離合器

右腳：繼續坐車，右腳而家先好落地

左腳：踢返側架落地

最後車身左邊落車，完成成個考試

總結

唔少同學都好怕加路連山道接駁連道嘅讓路口，同埋樂活道嘅大斜路。要應付讓路口，應該多加練習停車位置，熟悉視覺盲點、交通情況，就算車多等得耐都無須緊張。至於大斜路，就應該練好斜路開車停車功夫。如果你準備緊電單車路試，上面講嘅呢啲技巧都已經包括曬喺我呢個電單車路試網上課程：

常見問題

樂活線同樂活道係咪同一條考試路線？
係。文章可以用「掃桿埔樂活線」稱呼整條考試路線，而大斜路所在道路係樂活道。

樂活道大斜路要用一波定二波？
視乎車速、車款同交通情況。通爽上斜可以使用合適低波；預計需要停車，就應提早準備一波。

加路連山道讓路口係咪一定要停車？
讓路線要求讓路予大路車輛，如有需要便停車。重點係睇清楚及確保有安全空間，唔係為停而停。

樂活線同東院線邊條容易？
兩條線考驗唔同。樂活線較集中斜路、讓路同上落斜控制；東院線就較多人車、支路及障礙物判斷。

透過呢個網上課程嘅知識配合實戰訓練，輕鬆駕馭電單車路試！

輝Sir電單車學員而家報讀網上課程，更可享總共高達$1,899回贈，詳情請立即聯絡我：61984059