『想快就上波，想慢就落波』，不論在強制試、路試，還是電單車補鐘時，我也經常會聽到同學這樣說，這個講法究竟有什麼問題？

轉波有很多做法，當中的關鍵其實在於轉波動作的快慢，同埋吊「極力子」。今日輝Sir就和你深入淺出了解轉波，提升你的電單車技術和考電單車合格率！

為甚麼你要真正學懂轉波？

無論係強制試定係路試，學電單車時好多同學都「轉到波」，但真正懂得轉波就少之又少。轉得差，不單考試會有機會因此肥佬（空波滑行、未能選用適當波段、轉波時發出撞擊聲、未能入波、離合器使用不當等等項目），行駛時上突然「疾疾下」，甚至行駛途中死火跪低更是非常危險。

其實所謂轉波，即是透過操控離合器（極力子，Clutch），改變波段。除非你有很大興趣，否則無須深入理解當中機械原理，我們可以簡單理解為選擇合適的齒輪，配合你的駕駛狀況。起步時用低波，有較高嘅扭力，塞車、慢車等等亦應用低波；而想行得快就要用高波，犧牲部份扭力，換來更快的車速，適合暢通的路段。

轉波幾個基本步驟

轉波有6個步驟，想轉得順，關鍵是控制好每個步驟嘅速度，以及吊極力子。以上波為例：

1.先收晒油門（不要再加油加速）

2.左手快揸離合器

3.左腳快剔高波棍

4.左手離合器快放到摩擦點，吊極力子定住在摩擦點

5.右手補少少油，定住油門

6.左手慢放埋剩低嘅既離合器，完成整個上波過程

同樣，想落波：

1.先收晒油門

2.左手快揸離合器

3.左腳快剔低波棍

4.左手離合器快放到摩擦點，吊極力子定住摩擦點

5.如果落波之後會繼續行，就定住少少油

6.左手慢放埋剩低嘅既離合器，完成整個落波過程

學懂「吊極力子」的額外好處

除了上述各個動作的快慢，「吊極力子」也是經常被大家忽略的要點。補油最好的時間，是剛剛定住磨擦點，就開始慢慢補油；如果放到超過磨擦點才補油 ，車會chok而且不穩定。

學懂吊極力子好同適時補油，還有以下好處：

1. 平路起步快夾爽

2. 斜路起步更能避免死火

3. 就算上波轉數不太適合，都比較不容易死火或無力

4. 就算落波轉數不太適合， 車都不會太chok

到了日後合格並「甩P」後，你或許有機會載其他乘客。很多乘客未必有電單車牌，但他們往往會說「我唔鍾意坐某一啲司機嘅車尾」，當中很大程度就和吊極力子、補油這串動作有關。

『想快就上波，想慢就落波』有甚麼問題？

考考你先，這個講法只是啱得一半，究竟有咩問題呢？

開估：弊在太簡單化，完全無考慮過車輛的狀態！

想加速要上波的確無錯，但如果轉數未夠高，反而一上完波車輛就無力，不但無法加速，更有機會死火；相反，如果車速未夠慢、轉數未夠低就落波，車就突然會好「chok」，更會好嘈，同樣有機會令你考試肥佬，日後經常這樣駕駛亦會傷車。

如何判斷需要轉波？一個簡單辦法幫到你

最簡單的辦法，就是根據當時車輛的狀況去選擇波段。

舉例當路面暢通，你需要加速，你會俾油，轉數開始升高，引擎開始嘈，當你感覺到架車嘅震動波幅好頻密，就是時候上波；相反你要減速，架車轉數開始降低，你會發現架車無力（在車輛變得chok之前），就是時候落波。揸車要因應路面情況轉波，雖然轉波手法因人而異，但原則就萬變不離其宗。

小總結：

轉波決定了整個駕駛的流暢度，轉得差的話，更有機會令你直接在電單車駕駛考試肥佬。轉波的竅門在於動作快慢與吊極力子，並非只在使用波棍轉波的一瞬間。正在準備考電單車牌的你，如果有任何技術上的疑問，輝Sir可以為你提供1對1免費諮詢，立即留下你的聯絡方法：https://faisirmotorbike.com/online-enquiry/

為你而設的電單車路試課程（網上無限次重溫影片&筆記）

學電單車，知識和實戰缺一不可，想知多啲貼士技巧的你，又怎可以錯過輝Sir為路試同學設計的【道路試驗の合格率UP】－路試秘笈。現在開放了2堂免費課堂，立即觀看：https://bit.ly/3yaj6t1