上次就講解過銅鑼灣掃桿埔嘅東院線，今日就講講另一條路線 – 樂活線。樂活線雖然有條斜路，但係一般而言交通情況都比起東院線通爽。想應考樂活線萬無一失，就要學識「緩衝區」嘅概念。未聽過「緩衝區」？以下將會為大家介紹呢條路線，同埋當中需要特別留意嘅地方！

這不只是一篇路線介紹文章

如何善用這篇文章和影片，才能達到最大成效？認得路線點行遠遠未夠，呢次輝Sir希望大家留意細節，例如我選擇嘅線位、觀察嘅方向同原因，呢啲都能幫助你找出並避開潛在的危險，改善你嘅駕駛情況同增加考試合格機會。尤其係Youtube的實拍影片，輝Sir一take過拍攝，即場錄音無後期配音，裡面包含咗我好多心得，大家記得留意我講嘅重點同埋行嘅位置。

（一）出試場，入加路連山道

喺掃桿埔試場打完八字，落斜路，路口查看四周交通情況，安全情況下左轉，左轉入加路連山道。

如果交通情況順暢就記得選擇適當波段行駛，不但要留意後方有無車想超車，亦要留意停車場有無車出入。對面線有時會停泊私家車、貨車上落貨、的士上落客，甚至會使用你嘅行車線，記得判斷有無足夠空隙繼續行駛。沿路駛到連道讓路口。

（二）加路連山道（接駁連道）讓路口

輝Sir有幾個貼士俾大家：

（1）不妨停得比較貼近白色虛線，咁先比較容易睇到從上而下嘅交通情況，不過切記唔可以踩界呀！

（2）避免扭右軚同急速剎車。路面左高右低，停車扭右軚的話，架車向右傾，增加落右腳風險。另外路面不平，急速剎車亦更容易失平衡。

（3）試下判斷夠唔夠位俾你同考官一齊過到個讓路口，唔好見有少少位就出，盡量預返足夠你同考官都出到，咁就穩陣得多。出到路口係一回事，安全出到路口又係另外一回事。

（三）加路連山道（保良局段）

小心留意路面線路同黃格，黃格所在亦係保良局停車場出入口，宜收慢車速，留意有無車。駛至樂活線嘅第一盞交通燈前就已經要預早留意前方讓路口有冇車，再左轉入禮頓道。

（四）禮頓道

繼續往前駛，你應該會去到第二盞交通燈。交通燈後禮頓里有路口需要留意，而且地面有黃格，宜與前車保持距離，等自己有足夠時間做反應。過咗禮頓里，去到第三盞交通燈，前面有一個比較長嘅黃格區域，同樣需要留意。

一直駛到皇冠假日酒店門口，記得留意有無車進出，連對面線也有機會有車轉入。在黄格前預先選好將會要行邊一條行車線，再過埋第5盞交通燈左轉入黃泥涌道。

（五）黃泥涌道

黃泥涌道左邊線常有私家車停泊，右邊則有電車行駛。電車軌比較滑，如果需要喺電車線行駛，應該保持喺兩條電車軌中間嘅瀝青路行駛。

一直行在紀利華木球會旁嘅第六盞交通燈，之後將會抵達黃泥涌道巴士站。如果巴士停車嘅時候任何部份佔用你嘅行車線，你都需要做足過障礙物動作。過埋巴士站，你將會左轉上樂活道。

（六）轉入樂活道上斜

從黃泥涌道第7個燈位，左轉入樂活道上斜，樂活道頗為陡斜，建議以低波行車。上斜會經過兩個路口，第一個在左邊聖瑪加利大堂，第二個在右邊雲地利道，宜多加留意。

上斜如果需要停車，宜提早轉回一波，以免手忙腳亂；斜路開車亦要俾多啲油，避免溜後，跟住一直上到頂會見到樂活線嘅第8盞交通燈。

（七）樂活道斜坡頂

喺上斜過完交通燈，前面斜坡頂就係黃格，加上斜坡令你視線受阻，究竟應該點樣處理呢？出面好多駕駛課程都忽略咗教大家「緩衝區」，趁呢個機會輝Sir同大家講解下啦。其實道路規劃嘅時候都考慮到斜坡帶來嘅盲點，所以喺交通燈同黃格中間設立咗呢段空隙，就係所謂嘅「緩衝區」。如果你睇唔到前面黃格有無足夠空間通過，你可以喺緩衝區入面觀察，同時亦要避免同前車距離太近，盡量令自己視線可以望到前面交通情況。

通過黃格之前，斜坡頂左邊亦有路口需要留意。

（八）連道（落斜）