第一次買電單車，又唔識睇車、又牌簿又牌費又保險，係咪好頭痕呢？今日等輝Sir教識你買人生第一架二手電單車啦！

先睇車揀款

你可以根據用途、外觀、經濟原因等等考慮車款，如果你未肯定自己想要自動波定棍波，或者呢篇文 會幫到你。當你揀啱之後可以去比較熱門睇車嘅網站，例如有28car.com或者Facebook群組Motorbike for sell等等。當然你都可以去各大二手車行，不過今日就集中講私人買賣先啦！

約賣家睇車

正所謂見微知著，睇車不外乎係從外觀嘅蛛絲馬跡，睇下有無曾經撞過跌過、漏油滲油等等，從而判斷係咪一架狀態良好嘅車。當然就咁肉眼睇、聽聲判斷好有限，最好都係搵個專業人士幫手睇啦！

睇車注意事項

1. 如果有心買車，盡量唔好未睇就講價！你想買心頭好，車主同樣都係割愛賣緊心頭好。
2. 盡量喺日間有陽光嘅時間睇車，可以睇清楚暗位同顏色等等。
3. 最好拎塊鏡去，睇真引擎附近同車底及暗位嘅位置， 如果有好多油漬就要加倍小心，或者有機會係引擎漏油，可大可小。漏油問題同樣可以透過檢查避震、油管等等而觀察到。
4. 如果係睇水冷嘅電單車， 留意水箱蓋有無裂、水喉、膠塞有無老化等等。
5. 車嘅接駁位、鵝頸有無裂痕，又或者有無奇怪位置有從新焊接過嘅痕跡。
6. 睇機油（拔油尺）：正常係淺黃色；如果變咗奶白色／乳化，好可能入咗水，甚至係「水浸車」，要非常小心。
7. 睇輪胎：胎紋深淺、有無單邊偏磨（可能避震或車架有問題）、側邊有無裂紋或者鼓起。
8. 觀察架車有無曾經嚴重跌過或者「派車」。你可以檢查突出嘅部件，因為如果跌過，突出嘅部件（例如腳踏、牛角、把手）會最先落地，所以會刮花或者彎曲。最嚴重嘅係車架同把手都跌彎，連平衡都有難度！

預備文件

架車無問題、價錢又傾掂，就到準備買賣合約喇。你可以免費下載輝Sir嘅車輛買賣合約範本，雙方簽齊名、俾咗訂金之後，再同賣家約日子畀錢、交收同埋做轉名。至於過戶費（轉名費）由邊個俾，買賣雙方最好落訂前就講清楚（實際金額喺下面「轉名手續」會講）。

免費下載（輝Sir送俾你）

• 車輛買賣合約範本（PDF，可印可填）
• 買二手電單車睇車 Checklist（PDF）

用嚟簽約、睇車即用。買車前想搵人幫你睇車，或者唔想自己走去運輸署搞過戶？WhatsApp 輝Sir 講句「二手」就得。 順帶一提，好多初哥會撈亂「車輛登記文件」同「行車證」，講手續之前先分清楚：

• 車輛登記文件（俗稱牌簿）＝架車嘅「出世紙」，寫住車嘅基本資料（出廠同落地年份、容積、型號、顏色）同埋而家個車主係邊個。所謂「轉名」就係改呢份文件，證明架車過咗畀你——記得核對底盤號碼、引擎號碼同牌簿上面一致。
• 行車證＝架車嘅「身份證」，要擺喺車身左面當眼位，定期俾錢續領先可以出街，即係大家成日講嘅「牌費」。

保險問題

去運輸署轉名之前，你一定要自己先搵保險代理買保險。買咗之後，攞一份以「新車主名義」、喺過戶生效嗰日有效嘅第三者風險保險單／臨時保單（即係 Cover note）副本，先去得運輸署。至於幾耐批到，就問返你張保單嘅保險公司，唔好當一定一兩個鐘搞掂。輝Sir都可以幫你搵人出車保險報價，有需要搵我。 

輝Sir貼士：識睇車「跌過冇」係一種功力，但揸得穩、出到馬路又係另一種功力。好多學生都係買咗車先嚟搵我補鐘執手勢。想買車前就知自己揸唔揸得掂？WhatsApp輝Sir問新手評估。

轉名手續

架車、保險同錢都傾掂，就拎齊以下文件去運輸署辦理「轉名」（官方名稱：車輛過戶）：

1. TD25 車輛過戶通知書一式兩份，要由新舊車主雙方簽署，而舊車主簽名要同牌簿相符。過戶後72小時內，舊車主要交副本，新車主要帶正本、所需文件同費用到牌照事務處完成手續。 （相關官方安排：運輸署：車輛過戶通知書 TD25）
2. 舊車主牌簿正本（車輛登記文件）
3. 新車主身份證正本
4. 新車主已在遞交申請前三個月內完成核實嘅電子聯絡方式（香港流動電話號碼或電郵）。
5. 新車主有效住址證明（三個月內）正本副本皆可
6. 以新車主名義購備的第三者風險保險單或臨時保單（cover note）副本
7. $250（電單車及機動三輪車現行過戶費；收費以運輸署最新公布為準）。

輝Sir貼心提醒（過戶前必睇）：
①簽名要夾——好多人簽名有幾個版本，TD25上舊車主嘅簽名，一定要同牌簿上嘅簽名一模一樣；唔少新車主攞齊文件去到運輸署，先發現兩個簽名唔夾，白行一趟又要再約舊車主簽過。
②舊車主要「乾淨」——如果舊車主仲有未清嘅定額罰款（牛肉乾）、欠交牌費，甚至架車有未完成嘅「驗車令」，運輸署都有機會過唔到戶。落訂前可以叫賣方出一張免費「清白紙」（TD87(S)）證明冇未清罰款先好交易，唔好去到牌照事務處先卡住。 唔想自己走去運輸署排隊搞過戶？輝Sir有「文件代辦」服務，可代辦車輛過戶（轉名）、續牌、留牌、考試排期等。WhatsApp 輝Sir 問代辦。

行車證（續牌）

另要留意行車証（官方名稱：車輛牌照）過期未，如果上手牌費未過期，你可以略過呢部份；如果過期就要俾「牌費」，續領行車証，表格可以搵返最新嘅「續領車輛牌照申請書」（TD 558）： 有幾點值得留意：

（1）如被法庭命令繳交罰款，須先付清罰款，才可申請續牌。

（2）須要驗車的車輛，必須在遞交申請前完成驗車。

由2025年12月22日起，2年或以上未領牌車輛唔再單純因過期而自動取消登記。收到運輸署通知後，車主要喺通知日起三個月內續牌，或者喺車輛已拆毀或永久送離香港後辦理取消登記。

（4）你可以選擇購買4個月或者1年。

（5）行車證仍然要擺喺車上當眼位。由2024年12月30日起，運輸署新發嘅行車證已經唔再印屆滿日期，改為喺頂部加個 QR code，掃一掃就查到有效期；到期前運輸署會用你登記嘅電子聯絡方式提你續牌。所以就算你轉咗名、之後照樣要俾牌費續牌，只要車輛資料無變，都唔使特登換過張新行車證，繼續用返同一張就得。

少少建議

• 第一次睇車唔好扮專家。唔識睇好正常，最好搵埋識睇車嘅朋友一齊去。
• 熟唔熟都好，一切文件、錢銀最好清清楚楚，交易順暢之餘留個好印象，分分鐘變老友。
• 避免有嘢遺留或錯誤，最好新舊車主一齊去運輸署當面搞，過完數、轉完名即場交收架車，大家都有保障（簽名要夾、舊車主無欠費呢啲上面已經講咗）。
• 想最安心，梗係搵專業人士，例如車房朋友幫手睇睇！

常見問題 FAQ

Q：買二手電單車前，要唔要「查冊」？
A：建議做，而且有兩樣可以查：
①「車輛登記細節證明書」（約$45）——核實賣家係咪登記車主、引擎／底盤號碼同牌簿一致；
②「清白紙」（正式名「無欠繳罰款或訴訟費記錄及無違例記錄證明書」，表格 TD87(S)，免費）——查架車有無未清罰款、違例或被法庭暫停牌照。

Q：電單車仲供緊（分期未清）可唔可以買？
A：要好小心。香港冇公開嘅車輛按揭查冊，財務風險主要靠合約保障：喺買賣合約寫明賣家保證車輛冇未清分期／財務，最好同日過數＋過戶，確認新車主資料入咗運輸署系統先找尾數。

Q：得學牌可唔可以買電單車自己練習？ 可以。持電單車學牌可以直接買第三者保險，喺非限制道路自己練習；但學牌保A：險只保練習用途，攞去送外賣等商業活動會令保險失效，甚至可能被取消駕駛執照。

Q：電單車唔轉名／唔過戶得唔得？ 唔好。就算賣咗俾親戚朋友，只要冇過戶，架車喺運輸署仍然登記喺舊車主名下；之A：後所有告票、罰款同法律責任都會算返舊車主度，萬一對方無牌駕駛出事，舊車主仲可能被控「容許他人無牌駕駛」。所以一定要正式過戶。

買完車之後，輝Sir仲可以點幫到你？

輝Sir唔淨止教考牌。買車之後嘅事都幫到你：文件代辦（過戶、續牌、留牌）；日常保養同買車前check車貼士（可睇「電單車日常駕駛全攻略」網上課程同實體維修班）；想真係揸得穩、一次考到牌，就有新手班、強制試、路試、有牌補鐘課程。想知邊樣岩你？WhatsApp輝Sir，即刻幫你評估 → 即刻查詢課程