政府「持續進修基金」有成$25000！用政府錢可以考車牌，是不是吸引得有點不可思議呢？輝Sir 經常收到查詢，問有無得用 「持續進修基金」 (Continuing Education Fund, CEF) 學電單車（同埋私家車、貨Van）。今日就送個Q&A俾大家！

什麼車牌可以用「持續進修基金」？電單車可以用嗎？

現時「持續進修基金」認可課程只包括私家車、輕型貨車、中型貨車同大巴，全香港暫時都未有得用 CEF學電單車。雖然無得學電單車，輝Sir都照講一下用「持續進修基金」學其他車種的利弊。

考電單車牌的流程請參考：

「持續進修基金」是否完全由政府出錢？你$1都無需要出？

不是！政府只會資助部份。

政府會資助每人25000元（成世人計），但並不是全額資助所有學費。政府會資助課程⾸$10,000費用的80%，及課程費用其餘$15,000的60%。以某駕駛學院的「輕型貨車駕駛證書課程」為例，學費總額$19,056，學一次車，就會花費你資助額中的$13934。

【 以下這句說話將會反覆出現】一日你未完成個課程同考試合格，一日你都要繼續在駕院學，直到合格！否則Claim不到錢！轉考其他車牌、轉學校、轉場、放棄等等，你就白白俾咗近兩萬元，但又考唔到牌。

實際學費其實多少？有無額外費用？

當然有額外費用！

以某駕駛學院的「輕型貨車駕駛證書課程」為例，學費總額$19,056，政府資助學費 $13934，你要付款 $5122。但有額外費用並不包括在課程，例如路試租車$2100、#學習駕駛執照 $548 同 #駕駛考試表格 $510 （俗稱 #路票，即係俾運輸署的考試費用），總共$3158。換言之，未計額外補鐘，夾埋都要自付款$8280元，其實費用同自己搵師傅學無甚麼分別。如果你之前有用過CEF，政府資助更少，你要付的費用則更多。
就算未計補鐘、重考等等費用，總共你要先俾$22214，最後只能claim返$13934，實際要自己俾$8280。

你知道嗎？用CEF考車，要考多幾個試、上多幾堂！

平時考車，考筆試、調頭泊位、行路線就搞掂；但係CEF的「駕駛證書課程」 要求學生完成運輸署路試後，要額外去上同職業司機相關的理論課同長途駕駛實習課。

有多點考試路線以外地點實習本來是好事！不過學生需要考「畢業駕駛考試」 同 「畢業筆試」（兩個試取得65%合格後），才有資格去Claim持續進修基金。想拎返自己的錢，比起一般考車難度更高！「畢業駕駛考試」要考返長途公共路面實習三堂學過的野，同學要揸長途車，上下高速公路等等。

俾咁貴，其實包啲咩？原來得18小時有導師坐你隔離，教你揸車考牌

輝 Sir同你拆解下先！以全香港某駕院「私家車駕駛證書課程」及「輕型貨車駕駛證書課程」CEF 課程為例，堂數「總共」有46節課堂，但好多都是理論課、隨車觀察等等，亦有3節係考牌後學習長途公路駕駛；當中只有18小時（24節，每節45分鐘，每堂2節，即12堂1.5小時）是有導師坐你旁邊，在車上教你駕駛，為考車牌備戰。運輸署建議於考試前最少要接受三十小時以上的駕駛訓練。12堂夠不夠？那就非常視乎個別同學能力了。

想多加練習或者補鐘？那就自己「課金」吧，全無資助。在駕駛學院私人場地練習，補鐘收費當然會計到足。

CEF課程詳細內容：原來有隱藏關卡？

課程分為三部份：

【隱藏關卡1】通過 #讀寫能力評核，確保你識睇識聽中文。

有２節理論科，教同學考運輸署 #甲部 #筆試。

筆試合格後，就預備考路試。其中包括：

1. 6節55分鐘的理論課。
2. 駕駛練習同隨車觀察堂就每節45分鐘，內容包括：
   -３節基礎訓練，好似機舖打機咁
   – 24節真正有得揸車，學泊位、調頭、行路線
   – 5節坐車尾，隨車觀察
   – 1節 獨立訓練。有幾獨立？絕對不是1對1獨立訓練，而是有一位導師在出面俾指示，三個同學各自在車內，獨自練習泊位調頭，導師睇住大家表現。如果有一位同學係咁出錯，例如撞埋雪糕筒，導師會停哂所有人。
   – 1節模擬考試。估計路試勝算有幾多。

順利路試合格，可以Claim到錢未？未啦！同學仲要上多個針對做職業司機的實務訓練。即係仲有【隱藏關卡2】！

1. 上多一節理論堂
2. 上三節 #長途公共路面實習，學下入高速公路、迴旋處等等路試無學過的技巧

出席率要幾多？出席太少無得claim！

駕駛實習課堂要出席夠70%，而理論堂就算你唔想聽，都要出席夠70%。達唔到標？無得Claim錢囉！

萬一路試肥佬，重考點計數？CEF包幾多？重考有限期嗎？

CEF完全不涵蓋重考的費用。考車個個都希望1 take pass，但世事並不盡如人意，絕對需要考慮到肥佬後的狀況。

同學可以報名重考，不過重考就無得申請CEF。CEF只包第一次考試。課程的學籍有效期為24個月。萬一同學喺運輸署駕駛考試肥佬，難以在24個月內完成課程，可以申請延長學籍來重考。延長當然要俾錢，批唔批都要由駕院決定。

重考路試當然要跟返駕院，轉場就等同放棄，無得Claim錢。

【 以下這句說話將會反覆出現】一日你未完成個課程同考試合格，一日你都要繼續在駕院學，直到合格！否則Claim不到錢！轉考其他車牌、轉學校、轉場、放棄等等，你就白白俾咗近兩萬元，但又考唔到牌。

上面講過，CEF課程要考埋「畢業駕駛考試」同「畢業筆試」。如果你肥咗「畢業駕駛考試」或者「畢業筆試」，都要重考。考試同補鐘收費唔知收幾多，資訊不透明。

可否轉會，唔考Van仔（輕型貨車）轉考私家車？

如果考Van仔力有不逮，唔少人都會考慮轉考私家車，但原來CEF並不容許！

【 以下這句說話將會反覆出現】一日你未完成個課程同考試合格，一日你都要繼續在駕院學，直到合格！否則Claim不到錢！轉考其他車牌、轉學校、轉場、放棄等等，你就白白俾咗近兩萬元，但又考唔到牌。

想放棄？想轉學校？想轉考場？唔想考？

可能你唔想考或想轉場，申請退款，咁就要睇條款，是有機會得的，不過扣埋之前學費同$500手續費，應該都所剩無幾，詳情同樣難找資訊。

總結

以為有著數，但仲有好多隱藏收費；堂數看似好多，其實真正落手揸車，預備考車牌的，只有18小時。萬一肥佬，就好似「洗濕咗個頭」，焗住要繼續幫襯佢，否則血本無歸。

雖然電單車而家暫時未有「持續進修基金」（CEF）的課程，但如果有朝一日有新課程，大家報名之前就三思了！

一個幫到你的電單車導師

如果你希望有一個專業的導師全程照顧你的學習，請立即留名：https://faisirmotorbike.com/online-enquiry/

現在成為Grand會員（https://faisirmotorbike.com/latest-programs/membership-grand/），輝Sir的團隊不僅成為你的貼身顧問，更會為你送上源源不絕的課堂和購物優惠！如果有任何學車疑問，或想了解更多有關的詳情：可以WhatsApp 96762386 /留底你的聯絡資料，我們會盡快聯繫你